Алматыда әскерге кеткен сарбаз үш ай бойы комада жатыр

Ата-анасы жігіттің өзі құлағанына сенбейді

Бейнежазбадан үзінді

Алматыдағы 5571 әскери бөлімінің сарбазы Ербаян Мұхтар 3,5 айдан астам уақыт бойы комада жатыр, ол әскери қызметін атқарып жүргенде, бас-ми жарақатын алған. Ата-анасына жігіт әскери бөлімнің әжетханасында құлап, басымен тақтайшаға соғылды деп айтқан, бірақ олар бұл нұсқаға сенбейді. Бұл туралы Stan.kz ақпарат агенттігі “Азаттық” радиосына сілтеме жасап хабарлайды. 

Әскерге шақырылған жігіттің әкесі Хамит Айтмағамбетовтің айтуынша, жігіт өздігінен құлаған болса, бір жарақат алушы еді. Алайда Ербаян Мұхтар екі жерінен жарақат алған.

"Желкесінен және басының алды жағынан зақым алды. Менің ойымша, олар оны ұрған, сол кезде ол басымен артқа құлады. Яғни, олар ұрғандықтан, ол құлады", – дейді жігіттің әкесі.

Ербаян ауруханаға желтоқсан айында түскен. Оған мидың ауыр контузиясы, мидың қысылуы, оң жақта фронто-париетальды-самай аймағының жедел субдуральды гематомасы, оң жақта желке сүйегінің сынуы, мидың ісінуі және желке аймағындағы контузияланған жара диагнозы қойылды.

"Науқасқа ота жасалды, оянғанда оны әскери госпитальға ауыстырды. Сол жерде сарбаздың жағдайы нашарлап, комаға түсті. Содан бері нейрохирургтер оған тағы төрт ота жасады", – деп толықтырды басылым.

21 жастағы Ербаян Мұхтар әскер қатарына өткен көктемде шақырылған. Ол кезде Астанадағы университеттің бірінші курсында оқитын. Бұл кезде ол футболмен айналысып, қақпашы ретінде "Оқжетпес" клубының қосалқы сапында болған. Анасының айтуынша, Ербаян болашақта балаларды оқытуды армандаған.

Ербаян қызмет еткен бөлімнің әскери дәрігері сарбаздың оқиғадан кейін есін жиғанын, бірақ бас ауруына шағымданғанын айтты. Олар жігіттің басы айналып құлағанын атап өтті.

Loading...