Көкшетауда 44 сарбаз ауруханаға жедел жеткізілді

Қазір әскери бөлімшеге белгілі бір шектеулер енгізілген

Қорғаныс министрлігінің баспасөз қызметі

Көкшетау қаласындағы 5510 әскери бөлімшесінің сарбаздары жаппай ауруханаға жеткізіліп жатыр. Олардың қызуы көтеріліп, басы ауырған. Сондықтан жауынгерлер инфекциялық ауруханаға жатқызылды. Қазірдің өзінде науқас саны 44-ке жетті, деп хабарлады КТК телеарнасы.

Олардың бесеуінен менингококк бактериясы табылған. Біреуінің жағдайы тым ауыр дейді дәрігерлер. Қазір әскери бөлімшенің сарбаздары қаладағы қоғамдық тәртіпті қадағалауға шықпайтын болған. Себебі бөлімшедегі басқа жауынгерлер де толық тексеруден өтуде.

Аян Тілеухан әскер қатарына бір ай бұрын ғана қосылған. Отан алдындағы борышын өтеуге Қарағанды қаласынан келген жас жігіт әскери тәртіпке енді ғана үйренісе бастаған. Әлі бөлімше аумағынан шығып көрмепті. Соған қарамастан, аяқ астынан ауырып қалған.

«Өзім таңертеңнен бір тұрдым.Сол кезде тоңып, басым ауыра бастады. Медпунктқа бардым. Бер жаққа алып кетті. Бірге түстік, сол түні тап екеуіміз бір уақытта ауырдық», - дейді сарбаз Аян Тілеухан.

Денсаулығы сыр берген сарбаздарды әскери бөлімшедегі дәрігер қараған. Бірақ жазылудың орнына ауруы әбден асқынған соң оларды қаланың ауруханасына жеткізген. Науқастарды қабылдаған дәрігерлер олардың бірі өлуге шақ қалғанын айтады. Жедел қимылдап, жүрегі тоқтаған жігіттің есін жиғызған.  

«Бізге ауруханаға әкелгенде 40 градус температура, безгегі ұстап, қалтырап тұрды. Алты адам бірақ түсті, одан соң тағы бірнешеуі. Бір сарбаздың жағдайы мүлдем мүшкіл болды. Денесі құрысып, тартылып, тіпті жүрегі тоқтап барып, әйтеуір дәрігерлер жанын сақтап қалды. Әлі де жансақтау бөлімшесінде жатыр.Нақты толық есін жиды деп айта алмаймын», - дейді Көкшетау көпсалалы ауруханасының директоры Сәкен Қалымжанов.

Қазір әскери бөлімшеге жан-жақтан мамандар жиналып, жағдайды зерттеп жатыр. Себебі сарбаздардың жаппай мұрттай ұшуына не себеп екені белгісіз. Қазірдің өзінде жұқпалы аурулар ауруханасында 44 сарбаз емделіп жатыр.

«Қазір жұқпалы ауруларға қарсы шаралар жүргізіп жатыр.Әскери бөлімшеде сарбаздарды жан-жақты тексеретін мүмкіндік жоқ. Бір дәрігер ғана бар. Олардың барлығы бірдей медицина бекетінде емделе алмайды. Ал түрлі сараптама қорытындылары дайын болғаннан кейін қызметтік тексеріс жүргізіледі. Жаппай ауру себебі анықталған соң кінәлі әскерилерді анықтаймыз», - дейді ҚР Ұлттық ұланы «Орталық» өңірлік қолбасшылығы медицина басқармасының бастығы Рашид Әбілмәжінов.

Сарбаздар осы күндері қаладағы қоғамдық тәртіпті қадағалауға шықпайды. Тіпті түгел бөлімше болып бірге сапқа тұруға да тыйым салынған. Өйткені сырқаттанғандар күн санап көбеюде.

Қазір әскери бөлімшеге белгілі бір шектеулер енгізілген. Ондағы осы науқастармен байланыста болған 278 адам толық тексерістен өткен. Бірақ олардың сараптама қорытындысы әлі дайын емес. Сондықтан жұқпалы дерт жұқтырғандар саны бұдан да артуы мүмкін.

Loading...